Розвивайся, Стороночко, Наш Карпатськый краю,И розцвітай, як косичка, Як природа в маю!..

НАША СТОРОНКА Народописно-педагогичный журнал На помуч русинськым школам Рочник І Число 1 Януар, 2009 р. Ужгород - 2009 До наших читательув Честовані читателі и читателькы! Русинські школярі и учителі! Родителі! Першый раз на сьому Божому світі починать выдаватися для Вас часописок из краснов назвов ”Наша сторонка”. Сесе значить, ош мы будеме усе видіти перед собов нашу Сторонку, наш Край, нашу Вутцюзнину, нашу Материзну, нашу Дідизну. Каждый найде у книжочці свої інтересы и жаданя проявити охоту и свої способности штось написати інтресноє для другых. Першоє число уже выходить на святоє Рождество Христово 2009 рока. Беріть сесе новоє чудо у свої рукы, читайте, аналізуйте, думайте, порунюйте, робіть свої выводы из того, про што читалисьте. Вы увидите, ош тото буде для Вас інтересно, забавно, а майголовноє – хосенно як для розвитка Вашого розуму, так для морального совершенства. Надіємеся, ош Вы будете не лем активными читателями, а и пристрастными писателями, дописовачами, авторами, нашими маленькыми кореспондентами, журналістами, будете набиратися практикы у публіцистиці, фольклористиці, етнографії (народопису), у литературнуй творчости. Наша головна ціль, обы кожда школна дьитинка добрі упознала свуй Карпатськый край, свою Сторонку, усокотила у своюй памняти исторію и народну културу свого народа и передавала, як естафетну паличку, наступным поколіням. Сесе єден из важных способув усокотити историчну памнять про свуй русинськый род. Розвивайся, Стороночко, Наш Карпатськый краю, И розцвітай, як косичка, Як природа в маю!.. Сердечно витаєме Вас из Новоручно-Рождественсько-Староноворучными святами. Най из краснов русинськов колядков зайдуть у Вашу хыжку здоровля, достаток, огень любови, добра и щастя! - Христос рождаєся! - Славіте єго! Редакційна колеґія Наша русинська школа Из 2008-2009 учебного рока булша часть русинськых школ на Подкарпатю перейшла из Недільної школы на новый формат – на Русинську гуманітарну народну школу. Айбо діло не лем у форматі, у назві. Пережый десятиручный опыт роботы показав, ош у порунані из Недільнов школов Русинська гуманітарна школа є май высшов, совершенной формов учебно-воститательного прпоцеса. Рамкы недільної школы уже стали тісными и не дуже ефективными. Сеся зміна продиктована новыми задачами, які стоять перед русинами. У перву очередь, русинська школа выкликана потребов укріпленя русинської націоналної ідеї. Школа через гуманітарні наукы формує націоналноє сознаніє у подростающого поколіня. Через школу, через многовікову русинську исторію, культуру, русинськоє народноє и професійноє искуство отбываться процес націоналного возроженя русинув на новуй стадії націоналного и общественного сознанія корінного русинського народа Подкарпатя. Для сеї великої ціли выдана нова учебна програма из шести предметув, збогачена новов методиков урочної роботы, новыми педагогичными принципами ( прагматизма, ціленаправлености, практицизма, народности ідейности). Под сесю програму проектувуться нові учебникы и спеціалні подручні матеріалы (хрестоматії, зборникы русинської поезії и прозы, співанкового фолклора и др.). Выдані и нові класні книгы (журналы) для запису проведеної учителями и учениками роботы. На ушитку перераховану роботу треба немалый час. Завто поточный учебный рук не дасть повного забезпеченя учебно-методичної базы, або открывать добру перспективу уже на майближый період. Великі сподіванкы покладавуться на управлінськый апарат Русинської гуманітарної народної школы, куды входять: Шипович Ю.Ю. – управитель школы (Плоскоє), Иляшевич Л.И. – заміститель управителя и голова методичної рады (Березникы), Безик М.И. – методист по русинському языку (Голубинноє), Мегела А.М. – методист по русинськуй літературі (Перечин), Філей С.Ю. методист из русинської исторії (Хижа), Попович О.Ф. – методист из неурочної роботы (Поляна), Безик А.В. – методист из проблем морального воспитаня (Голубинноє). По новому плануєся робота из родителями наших діточок. При русинських школах выбрані родительські комітеты, які у майближому часі будуть мати общі зборы. Выроблені нові подходы до організації неурочної роботы: кожда екскурсія, выход у природу, посіщеня музейув, замкув, монастырьув будуть мати характер научної експедиції. Из цільов розширеня передового педагогичного опыта роботы учительув, популяризації творчества ученикув из 1 януара 2009 рока буде выходити реґуларный педагогично- народописный журнал ”Наша сторонка”. Маєме сподіванку, што сесь журналчик стане добрым зерькалом отображеня роботы Русинської гуманітарної народної школы. М.Алмашій http://podkarpatrus.livejournal.com/